Magtatrabaho lamang si Philippine National Police (PNP) Chief P/Gen. Camilo Cascolan hanggang sa sumapit na ang kaniyang ika-56 na kaarawan sa Nobyembre 10.
Ito ang inihayag ng PNP Chief nang tanungin hinggil sa posibilidad na mapalawig pa ang kaniyang termino bilang hepe ng pambansang pulisya sa nakalipas na dalawang buwan.
Ayon kay Cascolan, hindi siya titigil hanggang marating na ng PNP ang kaniyang pinapangarap na 9 point agenda para sa PNP sa ilalim ng kanilang Patrol Plan 2030.
Gayunman, ipinagmalaki ng PNP Chief na bagama’t maikli lang ang kaniyang naging termino, naging makabuluhan at mabunga naman ito dahil kaniyang naibalik ang imahe ng mga pulis na disiplinado, respetado at responsable.
Samantala, sinabi rin ni Cascolan na bukas siya sa anumang posisyong i-alok sa kaniya ni Pangulong Rodrigo Duterte matapos ang kaniyang serbisyo bilang hepe ng pambansang pulisya.
