Pinagtawanan lamang ng abugado ng Malakanyang ang plano ni Egdar Matobato na idulog sa International Criminal Court ang sinasabing extra judicial killings na kinasasangkutan umano ni Pangulong Rodrigo Duterte.
Ayon kay Chief Presidential Legal Counsel Salvador Panelo, bahagi lamang ng propaganda laban kay Pangulong Duterte ang pahayag ang banta ni Matobato.
Handa aniyang tumugon ang palasyo pero ngayon pa lamang ay nakatitiyak siyang hindi tatayo ang reklamo laban sa Pangulo.
Payo ni Panelo kay Matobato, kailangang makapagpresenta ito ng matibay na ebidensiya bilang batayan ng pagsasampa ng kaso laban sa punong ehekutibo.
Naniniwala si Atty. Panelo na hindi talaga titigil ang mga kritiko ng Pangulo sa pag-iisip ng mga propaganda subalit kampante ang Palasyo na hindi magtatagumpay ang mga ito lalo’t malakas ang suporta ng publiko at mataas ang popularidad ng Pangulo.
By: Drew Nacino / Aileen Taliping
