Itinanggi ng AFP o Armed Forces of the Philippines ang lumabas na ulat na isang grupo na binubuo umano ng mga militar at pulis ang nanawagan ng pagpapatalsik sa pwesto ni Pangulong Rodrigo Duterte.
Ayon kay AFP Spokesperson Brigadier General Restitutlo Padilla, ang naturang panawagan ng grupong nagpakilalang PADEM o Patriotic and Democratic Movement ay walang basehan.
Sinabi pa ni Padilla na malinaw na pamumulitika ang nasa likod ng nasabing usapin at hindi kailanman ito aayunan ng sandatahang lakas ng Pilipinas.
Kasabay nito, iginiit ni Padilla na mananatiling nasa tabi ng Pangulo ang AFP at patuloy na susuportahan ang administrasyon.
Una rito ay kinundena at pinapanagot ng grupong PADEM si Pangulong Duterte sa anila’y mga pagtataksil nito sa bayan, paglabag sa national sovereignty at karapatan ng mga Pilipino.
Inakusahan din ng grupo ang Pangulo sa paggamit sa AFP at PNP o Philippine National Police bilang kanyang private army at pagbibigay ng pabuya sa mga ito para sa pagsasagawa ng extra judicial killings (EJK’s) sa bansa.
