Pumalo sa ‘All–Time High Record’ ang bilang ng mga dayuhang turista na bumisita sa Pilipinas noong nakaraang taon.
Batay sa record ng Department of Tourism o DOT, umabot sa mahigit 6.6 milyong mga banyaga ang dumagsa sa iba’t ibang panig ng bansa noong 2017.
Labing isang porsyento (11%) ito na mas mataaas kumpara sa dami ng mga turistang dayuhan na nagtungo sa bansa noong 2016 na umabot sa 5.9 milyon.
Nabatid na sa mga buwan ng Enero at Disyembre noong nakaraang taon pinakadagsa ang mga dayuhang turista na pawang may bilang na mahigit 600,000.
Matatandaang una nang ibinida ng DOT ang paglago ng turismo sa Pilipinas noong 2017.
Ayon kay Tourism Secretary Wanda Teo, simula sa ginanap na Miss Universe pageant noong Enero 2017, nagtuloy – tuloy na ang pagpasok ng mga turista sa bansa.
Dagdag pa ni Teo, bukod sa ginanap na Miss Universe, malaking kadahilanan din ng pag–usbong ng turismo ay ang lumalaking bilang ng mga turistang mula sa China at India.
Gayundin ang kanyang mga naging biyahe sa ibang bansa kung saan nakikipag – ugnayan umano siya sa mga tour operator upang maimbitahan na bumisita sa Pilipinas.