Hindi nakikita ng Philippine Fireworks Association (PFA) na kailangang mag-angkat ng paputok ang Pilipinas ngayong nalalapit na ang pagsalubong ng bagong taon.
Sa gitna ito ng dagsa ng mga tao sa tindahan ng mga paputok lalo na sa Bulacan.
Sa panayam ng DWIZ kay Joven Ong, Presidente ng PFA, sinabi nitong tiwala silang sapat ang suplay ng paputok ngayong bagong taon.
Umaasa naman ang opisyal na mababawasan ang insidente ng pagkasugat dahil sa paputok, lalo’t marami dito ang ipinagbawal nang ibenta.
Samantala, pinayuhan naman ng PFA ang publiko na bumili lang ng paputok na may PS Mark logo, patunay na lehitimo at dekalidad ang produkto.
Tiniyak din nito ang kahandaang tumulong sa mga manufacturer na hirap makakuha ng PS Mark.