Nasa kamay na ng Land Transportation Franchising and Regulatory Board o LTFRB ang pagpapasya sa usapin ng tamang pamasahe.
Sa harap na rin ito ng magkasalungat na panawagan ng mga pampublikong tsuper at operators, maging ng sektor ng mga pasahero.
Sinabi ni Presidential Communications Secretary Sonny Coloma na tiwala ang Palasyo na ginagampanan ng LTFRB ng patas ang kanyang mandato kaya’t tiyak na pag-aaralang mabuti ang sitwasyon at ang posisyon ng magkabilang panig.
Iginigiit ng mga operators sa transport sector na huwag munang ibaba ang pasahe dahil hindi pa sila nakakabawi bunsod na rin ng matinding problema sa trapiko.
Pero, ayon sa mga mananakay o commuters, mababa na ang presyo ng diesel at iba pang produktong petrolyo kaya’t makatwirang ibaba na ang pamasahe.
Humihirit din ang ilang pasahero na ipako sa P30 o kaya babaan ng hanggang P25 ang flag down rate sa mga taxi dahil mababa na ang presyo ng mga produktong petrolyo.
Kaugnay nito, sinabi ni Coloma na sa tamang pagkakataon ay magpapasya ang LTFRB kung ano ang makatwirang pamasahe sa jeep at maging sa mga bus.
By Meann Tanbio | Aileen Taliping (Patrol 23)