Bukod sa mga mahahalagang posisyon na pagpipilian ng ating mga botante sa darating na halalan sa 2016, tulad ng Pangulo, Pangalawang Pangulo, mga Senador at mga opsiyal ng LGUs, nariyan din ang pagpili ng kinatawan para sa marginalized group o partylist.
Ang partylist group ay nakasaad sa batas nang ipasa ang 1987 Constitution na nag-aatas na isama sa House of Representatives ang mga grupo mula sa sektor ng mangggagawa, urban poor, indigenous cultural communities, kababaihan, kabataan at ilan pang sektor, ngunit di kasama ang nasa religious sector.
Batay sa batas, dapat makalikom ng nasa dalawang porsyento sa kabuuang national votes ang naturang partylist tiyak lamang sila mabibigyan ng isang upuan o seat sa Kongreso.
Kaya naman, nito lamang mga nagdaang lingo ay nagkumahog sa pagsumite ang mga luma at bagong partylist group.
Bagamat may ilang marginalized sektor ang nakapagtala na sa Commission on Election (COMELEC) at naghahangad na sila ay mapili muli, ay lumutang naman ang mga bagong partylist na kumakatawan umano sa mga basurero, construction workers at mga corn farmers.
Hindi naman masamang mapabilang sila sa listahan na pagpipilian, ngunit ang ayaw lamang nating mangyari dito ay ang posibleng isusumiteng “nominees” ng bawat partylist.
Tulad na lamang ng mga nagdaang napiling partylist, mantakin niyo sektor ng mga guwardiya at tricycle driver ay ginampanan ng isang milyonaryo at ni hindi man lamang nakapag-gwardiya sa tanang-buhay niya sa isang establisyamento kung kaya’t bakit ito napayagan noon ng COMELEC.
Mabuti’t napagtanto sa bandang huli na mali ang mga ganitong kalakaran sa halalan.
Ngayon mas pinangangambahang maulit ang ganitong eksena dahil hindi na kikilatisin ng poll body ang kanilang isusumiteng “nominee”.
Ibig sabihin nito, posibleng magsusulputan muli ang mga traditional politicians na nasa hanay ng rich and famous.
Sana maging mapanuri ang ating mga botante lalo na sa panahon ngayon na pinagaan ng COMELEC ang kanilang pagkilatis sa mga partylist.
Tandaan natin na mahalaga na ang kakatawan sa inyo ay yaong tunay na nasa inyong hanay na alam ang hinaing at saloobin, upang ganap na mapakikinggan ang inyong problema.
Huwag kayong magpagamit at huwag niyo kailanman ipagbili ang inyong hanay at inyong boto, kayo rin at baka magsisi kayo sa bandang huli.
