Panahon na para pag-aralan ang panibagong safety nets laban sa mataas na presyo ng langis.
Ito ang ipinanawagan ni Senator Sonny Angara sa gitna ng hindi maawat na pagsirit ng presyo ng mga produktong petrolyo dahil sa pagkontrol at paglimita sa supply ng langis ng Organization of Petroleum Exporting Countries.
Ayon kay Angara, makatutulong ang pamamahagi ng fuel subsidy sa transport sector subalit makabubuti na magsulong ng bagong safety nets kapag ganitong sobrang tumataas ang presyo ng langis.
Tulad anya noong 2018 na may otomatikong suspensyon ng excise tax sa langis kapag nasa 80 dollars na ang average price ng kada bariles ng krudo sa international market.
Gayunman, iginiit ng senador na hindi na applicaple sa ngayon ang naturang safety nets na nakapaloob sa Train Law.
Nakasaad sa naturang batas na kapag tumaas nang husto ang presyo ng langis dapat taasan ang pondo para sa conditional cash transfer para sa mahihirap na pamilya at pantawid pasada para naman sa mga nasa transport sector. —sa ulat ni Cely Ortega-Bueno (Patrol 19)