Halos kasama na sa pang araw-araw na buhay ni Pangulong Rodrigo Duterte ang makatanggap ng death threats.
Ito ang binigyang-diin ni Presidential Spokesperson Salvador Panelo kasunod ng ginawang paglalagay ng Presidential Security Group (PSG) ng bulletproof glass habang nagbibigay ng talumpati ang pangulo sa Malabon, kamakailan.
Pahayag ni Panelo, batid naman ng lahat na maraming kalaban ang pangulo lalo na sa paglaban nito sa lahat ng uri ng kasamaan partikular na sa isyu ng korupsyon at iligal na droga.
Sanay na aniya ang punong ehekutibo sa mga ganitong uri ng pagbabanta sa kanyang buhay kahit pa noong alkalde pa lamang siya ng Davao.
Kaugnay nito ay nilinaw din ni Panelo na naantala ang pagbibigay talumpati ng pangulo sa Malabon City ay dahil sa dami ng trabaho nito at hindi dahil sa anumang uri ng death threat.
