Pinawi ni Senate President Franklin Drilon ang pangamba ng mga manggagawa ng pamahalaan na hindi maibigay ang inaasam nilang umento sa kanilang sahod kung hindi maipapasa ang Salary Standardization Law (SSL).
Ayon kay Drilon, maaaring ipag-utos ng Pangulong Benigno Simeon Aquino lll ang pagbigay ng umento sa sahod ng may 1.3 million government workers sa loob ng isang taon habang nakabinbin sa bicameral conference committee ang SSL-4.
Ipinaliwanag ni Drilon na hindi magkasundo ang mababa at mataas na kapulungan ng kongreso sa issue na isama sa SSL-4 ang pensyon ng mga sundalo at pulis.
Mangangailangan aniya ng dagdag na P20 billion sa nakalaang P58 billion pesos na budget para sa salary increase ng government workers kung isasama ang pagtaas ng pensyon ng mga pulis at sundalo.
Ayon kay Drilon, kailangan ring resolbahin ang pagtaas ng pensyon ng mga sundalo at pulis dahil hindi naman sila sakop ng GSIS o Government Service Insurance System.
By Len Aguirre
