Magpapatuloy ang administrasyon sa pagtatrabaho para pagaanin ang pasanin ng mga ordinaryong Pilipino.
Ito ang tiniyak ng Malacañang sa gitna ng patuloy na pagbaba ng poverty incidence kasunod ng lumabas na self-rate poverty survey na nagsasabing 42% ng mga Pilipino ang nagsasabing sila ay hindi mahirap.
Sinabi ni Palace Press Officer Atty. Claire Castro na malaki ang nagawa ng mga programa ng pamahalaan na may kinalaman sa pagpapalabas ng food availability and affordability, edukasyon at social welfare bilang sanhi ng pagbaba ng poverty incidence.
Dagdag ni Usec. Castro, ayon kay Pangulong Marcos ay makatutulong din ang mga inisyatiba na naglalayong pagaanin ang mga problemang nakakaapekto sa small-scale businesses, public utilities, transportation services at street safety.
Bumaba rin sa record low na 8% ang mga Pilipinong nagsasabi na sila ay borderline poor mula sa 39% na naitala noong 2021.
