Pinuri ng isang mambabatas ang pagsusulong ni Pangulong Ferdinand Marcos Jr. sa kauna-unahang halalan sa Bangsamoro government sa 2025.
Ayon kay Basilan Rep. Mujiv Hataman, malaking bagay ang panghihikayat ni Pangulong Marcos na gawing matagumpay ang makasaysayang eleksyon.
Aniya, matagal nang ipinaglalaban ng mga mamamayan ng Bangsamoro Autonomous Region in Muslim Mindanao (BARMM) ang karapatan nito sa self-governance.
Dagdag pa ng mambabatas, masasabi lang na tunay na independent ang rehiyon kung malayang makakapili ang mga mamamayan nito ng kanilang mga lider sa pamamagitan ng malaya at maayos na halalan.
Nagpasalamat naman si Rep. Hataman sa suporta ng Pangulo dahil aniya, pinakamataas na simbolo ng kalayaan at demokrasya ang halalan.
Sa ilalim ng Republic Act No. 11054 o Bangsamoro Organic Law, noong 2022 pa dapat isinagawa ang eleksyon sa BARMM. Muli itong ipinagtibay sa 18th Congress.
