Tiniyak ng pamunuan ng Metro Rail Transit Line 3 (MRT-3) na masusunod ang umiiral na health protocols sa pagpapatupad ng libreng sakay.
Ito ay matapos magpatupad ng free ride program ang MRT-3 simula bukas, Lunes hanggang sa katapusan ng buwan ng Abril bilang pagdiriwang sa matagumpay na rehabilitasyon ng mga tren.
Ayon kay MRT-3 General Manager Michael Capati, magsasagawa sila ng regular na disinpeksyon sa bawat bagon ng tren at pagre-require ng pagsusuot ng face mask.
Maliban dito, mayroon pa rin aniyang temperature check, social distancing sa pilahan at platform gayundin ang pagpapatupad ng pagbabawal sa pakikipag-usap, pagkain at pag-inom sa loob ng sasakyan.
Magpapatakbo rin ng mas maraming tren ang MRT 3 para magsilbi sa inaasahang dagsa ng pasahero. —sa panulat ni Abbie Aliño-Angeles
