Umalma si Ozamiz City, Misamis Occidental Vice Mayor Nova Princess Parojinog-Echavez sa pagsalakay ng mga pulis sa kanilang compound na ikinasawi ng kanyang amang si Mayor Reynaldo “Aldong” Parojinog, inang si Susan at tiyuhin na si Provincial Board Member Octavio Parojinog.
Nanindigan ang Bise Alkalde na hindi niya pag-aari maging ng kanyang ama ang mga nasabat na shabu sa kanilang bahay.
PAKINGGAN: Bahagi ng pahayag ni Ozamiz Vice Mayor Nova Princess Parojinog-Echavez
Samantala, wala namang nakikitang mali si PNP o Philippine National Police Chief, Director General Ronald dela Rosa sa inilunsad na raid ng mga pulis.
Ayon kay Dela Rosa, matagal ng sangkot sa illegal drugs operation ang mga Parojinog at hindi naman ito sikreto sa Ozamiz.
Illegal drugs
Mahigit isang kilo ng shabu ang narekober ng mga awtoridad matapos salakayin ang compound nina Ozamiz City Mayor Reynaldo “Aldong” Parojinog at anak nitong si Vice Mayor Nova Princess Parojinog-Echavez.
Ayon kay Chief Inspector Jovie Espenido, Hepe ng Ozamiz City Police, bagaman ang search warrant na inihain ng criminal investigation and detection group ay para sa illegal possession of firearms, nagkataon namang nakarekober sila ng droga.
Bukod sa iligal na droga at mga drug paraphernalia, kalahating kilo pa ng shabu ang narekober din ng CIDG o Criminal Investigation and Detection Group sa bahay naman ng bise alkalde.
Napatay sa naturang operasyon ang alkalde, asawa nitong si Susan, kapatid at Board Member na si Octavio Parojinog at 12 iba makaraan umanong manlaban sa mga pulis.
By Drew Nacino
