Kinuwesyon ng kampo ni dating Senador Bongbong Marcos sa P.E.T. o Presidential Electoral Tribunal ang pagpayag nitong makakuha ng kopya ng mga balota ang kampo ni vice President Leni Robredo.
Kaugnay ito sa isasagawang re-count o pagbibilang muli ng mga boto patungkol sa inihaing electoral protest ni Marcos laban kay Robredo para sa pagka-pangalawang Pangulo sa nakalipas na May 2016 Presidential Elections.
Ayon sa kampo ni Marcos, maituturing na grave error ang ginawa ng P.E.T. dahil wala naman itong maibigay na matibay na dahilan kung bakit nila pinayagan ang hiling ni Robredo.
Giit ng kampo ni Marcos, walang anumang naging ambag sa gastusin ang kampo ni Robredo hinggil sa ginawang decryption sa ballot boxes gayundin sa election returns, audit log at iba pang dokumento sa mga clustered precincts sa mga pilot provinces na kasama sa inihaing protesta.
