Walang dahilan upang ipagpaliban ng mga kompaniya ang pagbibigay ng 13th month pay sa manggagawang Pilipino.
Inihayag ito sa DWIZ ng political analyst na si Prof. Ramon Casiple bilang reaksyon sa naging pahayag ng Department of Labor and Employment (DOLE).
Magugunitang inihayag ni Labor Sec. Silvestre Bello III na posible nilang payagan ang mga kompaniya na hindi muna magbigay ng 13th month pay.
Ito’y sa paniniwalang marami ring mga kumpaniya ang labis na naghirap dahil sa ilang buwang lockdown dulot ng COVID-19 pandemic.
Binigyang diin ni Casiple, kaya minamadali ni Pangulong Rodrigo Duterte ang pagpasa sa panukalang budget para sa susunod ay para gastusin sa mga programang may kinalaman sa COVID-19.
Hindi dapat yan maging dahilan, in fact, kaya nga lumaki yung budget ngayon kasi mas maraming pera ang ilalabas para sa ating mga manggagawa at mamamayan. Sinoman nagsabi niyan maling-mali siya at kung tumatakbo siya matatalo siya. Kailangan ngayon ay dapat maglabas ng pera ng gobyerno para matugunan yung mga walang pera. Tama naman yung budget, ako sa tingin ko, nung nakita ko yung budget ay may kakayahan, in fact maraming programa sa COVID-19 nakadepende sa budget na ‘yan,” ani Casiple.
Giit pa ni Casiple, walang dapat ibang sisihin kung hindi ang Kamara sa hindi agarang pagpasa ng budget dahil sa away pulitika.
Ang sabi naman ni Presidente ang importante mapasa yung budget, ang nangyari nabitin; pinasa sa 2nd reading, hindi ipinasa sa 3rd reading. Hindi maipasa sa Senado, ngayon sabi nila November na nila ipapasa ‘yan at ang Senado magsisimula ng sesyon nila November. Tingin ko, hawa yun. Binigyan mo ng maliit na panahon ang Senado para pag-usapan. Niloloko mo ang ating bayan dapat pagdating ng December 31 yung pera na ‘yan available para may magasta yung mga tao at gobyerno next year, away sila ngayon so, ipasa nila,” ani Casiple.