Umakyat na sa 700 ang naitalang kaso ng tigdas o measles sa Estados Unidos batay sa datos ng U.S Centers for Disease Control and Prevention.
Sinasabing ito na ang pinakamataas na bilang ng kaso ng tigdas sa Amerika sa nakalipas na 25 taon makaraang bumaba ang vaccination rates dahil sa talamak na misinformation doon.
Dahil dito, nanawagan si U.S President Donald Trump sa mga mamamayan ng Amerika na magpabakuna kontra tigdas taliwas sa nauna nitong pahayag na nakapagdudulot umano iyon ng autism sa mga kabataan.
Nag-ugat ang pahayag ng U.S President matapos na isailalim sa quarantine ang daan-daang mga mag-aaral at kawani ng dalawang unibersidad sa Los Angeles, California dahil sa pagkalat ng naturang sakit.
