Pinapurihan ng Department of National Defense ang mga tropa ng militar at pulisya kasunod ng pagkakapatay sa lider komunistang si Jorge “Ka Oris” Madlos at sa tinawag na Emir ng Dawlah Islamiyah na si Salahuddin Hassan.
Ayon kay Defense Sec. Delfin Lorenzana, malaking dagok sa hanay ng mga terrorista ang pagkakapaslang ng mga tropa ng pamahalaan kina ka oris at hassan dahil sa pinaigting na opensiba laban sa mga terroristang grupo.
Napatay sa magkahiwalay na operasyon sina Ka Oris at Hassan nitong weekend na itinuturing na tagumpay ng pamahalaan dahil sa pinalakas na kapasidad at kakayahan ng AFP at PNP gayundin ang suportang ibinigay ng publiko para labanan ang terrorismo.
Nanawagan naman si Lorenzana sa publiko na ipagpatuloy ang pagsuporta sa laban ng pamahalaan na makamit ang kapayapaan sa bansa upang tuluyan nang maabot ang kaunlaran. —sa ulat ni Jaymark Dagala (Patrol 9), sa panulat ni Hya Ludivico
