Muling iginiit ni Manila City 6th District Rep. Bienvenido “Benny” Abante ang pagbuhay sa death penalty.
Ayon kay Abante, parusang bitay ang tugon sa lumalalang korapsiyon sa penal system ng bansa na aniya’y kinakasangkapan ng mga makapangyarihan at bayarang kriminal para sa kanilang sariling mga interes.
Pinatunayan aniya ng nangyaring raid sa New Bilibid Prison (NBP) na kahit nakakulong ay “business as usual” ang mga kriminal at drug lords.
Matatandaang nagkasa ng sorpresang pagsalakay sa Bilibid ang mga opisyal ng Bureau of Corrections (BuCor) kung saan nasabat ang libu-libong de latang beer, cellular phones, illegal drugs, pera, at iba pang mga prohibited paraphernalia.
