Pinalagan ng isang commuter’s group ang mungkahi ng Land Transportation Franchising and Regulatory Board o LTFRB na ipagbawal na ang mga tricycle para gawing school service.
Ito’y sa harap na rin ng mga natatanggap na ulat at sumbong ng LTFRB hinggil sa overloading na mga tricycle kung saan, lulan ang mga mag-aaral na pawang nagsisiksikan sa loob at labas nito.
Ayon kay Atty. Ariel Inton, Pangulo ng LCSP o ang Lawyers for Commuter’s Safety and Protection, tila ang kawalan ng mahigpit na regulasyon at pagpapatupad ng batas trapiko ang siyang dahilan kaya’t nagiging peligroso sa mga estudyante ang pagsakay sa tricycle.
Marami aniyang mga mag-aaral ang umaasa sa mga tricycle lalo’t ito ang pinakamadaling sasakyan ng mga ito papasok at pauwi sa mga ubran areas man o kahit sa mga lalawigan.
Dapat aniyang maging mahigpit dito ang mga LGUs o local government units upang tiyakin na hindi overloaded, mahal sumingil at dumaraan sa mga national highway ang mga tricycle na siyang ugat ng mga aksidente.
—-
