Binatikos ng oposisyon ang umano’y napapaulat na pagtakbo ni Pangulong Rodrigo Duterte bilang vice president sa 2022 elections.
Ayon kay 1SAMBAYAN Convenor Atty. Howard Calleja, isang uri ng pang-iinsulto sa konstitusyon ng Pilipinas ang sinasabing planong pagtakbo ng pangulo bilang vice president sa oras na matapos na ang termino nito.
Dagdag pa ni Calleja, tila pagpapatawa at kawalan ng respeto sa mga Pilipino ang planong ito ng pangulo.
Inilarawan pa ni Calleja na isang “macrocosm of the Davao formula” ang paraan na ito ni Pangulong Duterte para lamang manatiling may nasa kapangyarihan kahit pa matapos na ang kaniyang termino bilang pangulo.
Ani Calleja, tiyak na sa ganitong perspektibo rin nakikita ng publiko ang ginagawa ng pangulo na malinaw umanong pansariling interes lamang.
