Ombuds Morales dapat magbitiw kung ayaw ma-impeach—VACC

Pinagbibitiw ng VACC o Volunteers Against Crime and Corruption si Ombudsman Conchita Carpio Morales.

Ayon kay VACC Chairman Dante Jimenez, mas makakabuti para kay Morales ang magbitiw kaysa impeachment.

Hindi anya kayang ilarawan ng mga salita lamang ang galit na kanilang nararamdaman matapos ipag-utos ni Morales ang pagsasampa ng malabnaw na kaso laban kay dating Pangulong Noynoy Aquino dahil sa naging papel nito sa operasyon ng SAF na nasawi sa Mamasapano, Maguindanao.

“Tapos kakasuhan mo lang ng graft, ang purpose talaga ni Morales, lusot, sino bang hindi susunod, siya ang commander in Chief at siya ang Presidente?” Pahayag ni Jimenez

Motion for reconsideration

Iaapela ng VACC o Volunteers Against Crime and Corruption ang desisyon ng Ombudsman na kasuhan lamang ng graft ang dating Pangulong Noynoy Aquino kaugnay sa pagkamatay ng SAF 44 sa Mamasapano Maguindanao.

Sinabi ni Atty. Ferdinand Topacio, abogado ng VACC na malinaw sa mga isinumite nilang ebidensya na kapabayaan sa panig ng Pangulo ang dahilan kayat nasawi sa kanilang operasyon ang apatnapu’t apat (44) na SAF commandos.

“Ang daliri ng pananagutan ay nakaturo sa mukha ni dating Pangulong Aquino, at isa pa po ang board of inquiry report sa pamumuno ni dating Police Director Benjamin Magalong na nagsasabing si Pangulong Aquino din po ang may kasalanan dito, yun pong dalawang yun naka-attached sa aming complaints kaya nagulat kami kung bakit ang sinasabi ng Ombudsman ay graft lang ito, paano naman yung mga nawalang buhay ng tao?” Ani Topacio  

Ayon kay Topacio, handang humarap uli sa imbestigasyon ng Senado ang mga kaanak ng SAF 44.

Sa katunayan , dalawang beses na anyang dumulog sa tanggapan ng Blue Ribbon Committee ang mga kaanak ng SAF 44 para muling buksan ang imbestigasyon.

“Nung unang inimbestigahan yan nakaupo pang Pangulo si Aquino, at yung mga heneral na resource persons, miyembro ng gabinete, ay mga nasa posisyon pa, ibig sabihin Commander in Chief nila si Pangulong Aquino kaya hindi sila malayang magsalita laban sa nakaupong Pangulo, ngayon po wala na sila sa puwesto.” Pahayag ni Topacio  

By Len Aguirre | Balitang Todong Lakas (Interview)   

Comments

comments