Nakahanda ang Office of the Civil Defense (OCD) na humarap sa imbestigasyon hinggil sa pagkamatay ng isang police doctor na nakalanghap ng disinfectant sa ultra-quarantine facility na pinangangasiwaan ng PNP.
Ayon kay Mark Timbal, Spokesman ng OCD, wala silang kinalaman sa ginamit na kemikal para sa disinfection ng ultra-quarantine facility.
Ang mga serbisyo anya na pinangangasiwaan ng OCD ay food catering, lodging para sa mga servicing personnel, probisyon para sa PPE’s, hygiene kits, medical equipment, medical supplies, janitorial services at waste collection at disposal.
Naniniwala si Timbal na mareresolba rin ng PNP ang pagkamatay ni Police Captain Casey Gutierez sa pamamagitan ng pag-eksamen sa mga proseso na ginamit sa pag-disinfect ng pasilidad at kung may sapat na proteksyon ang kanilang frontline staff.
Una nang sinabi ni PNP Chief, General Archie Gamboa na layon ng imbestigasyon na hindi lamang matukoy ang may pananagutan kundi upang maisayos rin at mapaganda pa ang proseso ng pangangasiwa nila sa pasilidad.
