Bukas ang National Disaster Risk Reduction and Management Council (NDRRMC) sa panawagan ni Senadora Nancy Binay na repasuhin ang Disaster Risk Reduction and Management (DRRM) Protocols ng pamahalaan.
Ito’y makaraang ihayag ni Binay na hindi katanggap – tanggap ang dami ng patay dahil sa bagyong Vinta na umabot na sa 164.
Ayon kay NDRRMC Spokesperson Mina Marasigan, dapat lamang na angkop ang mga polisiya ng ahensya lalo’t nagbabago aniya ang panahon kaya pabor sila sa naturang panukala.
Posible aniyang talakayin ang panukala ng senadora sakaling magpulong ang NDRRMC at iba pang ahensya ng pamahalaan sa unang bahagi ng bagong taong 2018 o dalawang dekada mula nang mabuo ang naturang polisiya.
Magugunitang sinabi ni Senador Binay na nakapagtataka kung paano sinapit ng Zamboanga Peninsula at Northern Mindanao ang delubyong dala ng bagyo gayong may mga babala naman sa tulong ng makabagong teknolohiya.
Dahil dito, dapat aniyang repasuhin muli ang Disaster Risk Reduction at Management Protocols upang mabatid kung nagkaroon ng mga iregularidad sa sistema at ano ang mga dapat baguhin.
