Iginiit ni NCRPO o National Capital Region Police Office chief director Guillermo Eleazar na bumababa na ang crime rate sa Metro Manila.
Sa kabila ito ng naging resulta ng pinakahuling survey ng SWS o Social Weather Station kung saan lumabas na tumaas ang bilang ang mga nabibiktima ng common crimes sa huling bahagi ng 2018.
Ayon kay Eleazar, bagama’t pababa ang trend sa krimen, inaasahan pa rin nilang magkakaroon ng fluctuation o paag-iiba-iba rito.
Binigyang diin pa ni Eleazar na bumaba na ng halos 54 percent ang crime rate sa Metro Manila sa unang tatlumpung (30) buwan ng administrasyong Duterte kumpara noong nakaraang administrasyon.
Kasabay nito, tiniyak naman ni Eleazar na patuloy at lalu pa nilang paiigtingin ang kanilang mga isinasagawang operasyon para labanan ang kriminalidad.
