Kinumpirma na ng Philippine National Police o PNP na kay Canadian hostage victim na si Robert Hall ang natagpuang pugot na ulo sa Jolo, Sulu noong isang linggo.
Ito ang kinumpirma ni C/Supt. Manuel Aranas, direktor ng PNP Crime Laboratory matapos ang isinagawang DNA testing sa natagpuang pugot na ulo.
Nagtugma aniya sa DNA records ni Hall na nagmula sa National Forensic Laboratory Services sa Canada ang specimen na kinuha mula sa naturang ulo.
Noong Biyernes pa aniya inilabas ang DNA matching results kay Hall at naibigay na ito sa embahada ng Canada sa Pilipinas.
Kasalukuyang nasa kustodiya na ng Canadian Embassy ang nasabing ulo habang patuloy pa rin ang paghahanap ng mga awtoridad ng Pilipinas sa katawan nito.
By Jaymark Dagala | Jonathan Andal (Patrol 31)
