Pumalo na sa higit 93,000 mga Overseas Filipino Workers (OFWs) ang naserbisyuhan ng one-stop-shop sa Ninoy Aquino International Airport (NAIA).
Sa datos ng Transportation Department, nasa kabuuang 93,560 OFWs na ang na-accommodate ng naturang programa na tumulong sa mga ito na maproseso ang kanilang pagsailalim sa mandatory 14-day quarantine kontra sa banta ng coronavirus disease 2019 (COVID-19).
Sa naturang bilang, 50,737 mga OFWs ang lumapag sa Terminal 1, habang 34,022 naman sa Terminal 2, at 8,801 sa Terminal 3.
Magugunitang sinimulan ang one-stop-shop noong ika-23 ng Abril ng ilang ahensya ng gobyerno, na layong tulungan ang mga nagbalik-bansang mga OFWs na maisailalim sa quarantine para matiyak na ligtas laban sa nakamamatay na virus.
