Pinaiimbestigahan na sa Senado ang umano’y taon-taong pagsasayang sa mga gamot at bakuna na binili ng Department of Health na umaabot sa bilyong piso ang halaga.
Sa inihaing Senate Resolution #403 ni Senador Raffy Tulfo, tinukoy ang report ng Commission on Audit (COA) ukol sa naging pattern na kada taon na expiration, malapit nang expiration, at pagkasira ng mga gamot, bakuna, at medical inventories ng DOH simula pa noong 2018.
Binanggit ng COA audit report na, noong 2024, may 34.8 million pesos na halaga ng mga gamot at medical inventories na nag-expire at may bukod na 99.5 million pesos na halaga ng aabutan ng expiration sa bodega dahil sa problema sa procurement planning, distribution, at monitoring.
Mayroon ding 7.4 billion pesos umanong halaga ng mga gamot at bakuna na nasayang noong 2022 at P11.18 billion noong 2023.
May ganito rin umanong pagsasayang mula 2015 hanggang 2021 sa ilalim ng nagdaang administrasyon.
Giit ni Tulfo, hindi ito makatarungan dahil milyong-milyong mahihirap na Filipino ang hindi makahingi sa barangay health centers at public hospitals ng mga gamot at vitamins, pero meron naman pala na nabubulok lamang sa mga bodega ng DOH.
Kaya mahalaga aniyang matukoy kung sino ang dapat panagutin, at malutas ang posibleng kahinaan sa sistema ng DOH para matigil ang pagsasayang sa public funds.—ulat mula kay Cely Ortega-Bueno (Patrol 19)
