Posibleng hindi magresulta sa malakas na pagsabog ang kasalukuyang aktibidad ng bulkang Mayon sa Albay.
Ayon sa Philippine Institute of Volcanology and Seismology o PHIVOLCS, maaaring i-kategorya ang aktibidad ng Mayon bilang “non-explosive eruption” sa kabila ng mga naitalang lava flow, pagyanig, ground deformation at namonitor na gas sa bulkan tulad noong 2006 at 2009.
Maaari lamang maganap ang isang major eruption bunsod ng labis na pressure bilang resulta ng gas volume sa loob ng bulkan.
Batay din sa aerial inspection ay walang “explosive deposits” gaya ng pyroclastic flows sa ilang bahagi ng Mayon.
Sa kabila nito, muling binalaan ng PHIVOLCS ang mga residente laban sa mudflow at lahar flow dahil sa pag-ulan at inabisuhang iwasan ang pagpasok sa danger zone.
Evacuees
Pinauwi na ang tinatayang labing isang libong (11,000) evacuees sa isang public school sa Legazpi Albay.
Napag-alamang ang mga pinauwing residente ay pawang nakatira sa labas ng anim hanggang pitong kilometrong danger zone.
Ang pagpapauwi sa mga residente ay batay sa naging rekomendasyon ng PHIVOLCS at ng Office of the Civil Defense.
Una nang sinabi ng PHIVOLCS na posibleng hindi naman magkaroon ng mapanganib na pagsabog ang Mount Mayon bagamat mas mabuti pa rin kung laging handa ang mamamayan.
–Len Aguirre
