Pinawi ng Manila Police District o MPD ang pangamba ng publiko kaugnay sa banta ng terorismo sa lungsod ng Maynila.
Ayon kay MPD Director Chief Supt. Joel Coronel, ligtas at wala silang namomonitor na anumang banta sa seguridad ng lungsod.
Dagdag pa ni Coronel, maigting pa rin ang kanilang pagbabantay kung may nakapasok na bang miyembro ng teroristang grupo sa lungsod katuwang ang National Intelligence Coordinating Council, Intelligence Service of the Armed Forces of the Philippines at Philippine National Police Intelligence Group.
Tuloy-tuloy din umano ang kanilang pakikipag-ugnayan sa mga Muslim communities sa Quiapo, Sta. Mesa at Baseco compound sa Tondo.
Magugunitang napabalitang may 100 na dayuhang Jihadist ang nakapasok umano sa bansa upang tulungan ang kanilang mga kasamahan matapos ang pagsasanay nila sa Indonesia.
—-
