Inabot ng mahigit 12 oras o kalahating araw ang Motu Propio Investigation ng House Ways and Means Committee hinggil sa ipinuslit na 6.4 Billion Peso Shabu Shipment na kinasasangkutan ng Bureau of Customs.
Idinetalye ng warehouse caretaker sa Valenzuela City na si Fidel Anoche Dee sa mga kongresista kung paano at kailan idineliver ang 600 kilo ng shabu mula China.
Ayon kay Dee, sa katunayan ay nagkaroon ng apat na shipment deliveries kung saan ang una ay noong June 2016, January 2017, March 2017 at May 2017.
Nirerentahan anya ng kanyang mga Taiwanese na boss na si Jhu Ming-Jyun simula noong Mayo 2016 ang warehouse sa Valenzuela kung saan ibinagsak ang Shabu.
Dagdag ni Dee, ang huling shipment ng shabu ang nasakote ng Bureau of Customs at Philippine Drug Enforcement Agency noong Mayo 26.
Tanging si Dee ang sinampahan ng kaso at inaresto kaugnay sa pinaka-malaking shabu shipment sa kasaysayan ng bansa.
By Drew Nacino