Inirekomenda ng Philippine National Police – Internal Affairs Service o PNP-IAS ang pagsibak sa serbisyo sa limang pulis na sangkot sa pagpatay kay dating Calbayog City Mayor Ronaldo Aquino.
Ayon kay PNP-IAS Inspector General Atty. Alfegar Triambulo, kabilang sa mga inirekumendang tanggalin sa serbisyo sina P/LtC. Harry Sucayre, P/LtC. Shyrile Tan at P/Lt. Julio Armeza Jr. pawang naka -assign sa Integrity Monitoring and Enforcement Group o IMEG.
Gayundin sina P/SSgt. Neil Cebu ng Explosives Ordinance Division o EOD /K9 ng Samar Provincial Police Office at P/Cpl. Edsel Omega ng Samar Provincial Police Drug Enforcement Unit.
Habang abswelto naman ang 16 na iba pang isinasangkot na pulis sa kasong administratibo.
Ayon kay Triambulo, lumabas sa resulta ng kanilang imbestigasyon na “ambush” at hindi “shootout” ang pagpaslang kay Mayor Aquino na dalawang taon na umanong pinagplanuhan.
Malinaw din aniya ang intensyon ng pagpatay dahil sa aabot sa 267 ang nakitang tama ng bala ng baril sa sasakyan ng Alkalde bukod pa sa nakitang 9 na tama ng bala ng baril sa windshield nito.
Hindi rin aniya maipaliwanag ng mga inakusahang pulis kung bakit nakabonet ang dalawang napatay nilang kasamahan na sina P/Capt. Joselito Tabada at P/SSgt Romeo Laoyan.— ulat mula kay Jaymark Dagala (Patrol 9)
