Tukoy na ng binuong Fact Finding Investigation Task Group ng Police Regional Office 4-A o CALABARZON PNP ang pagkakakilanlan ng pulis na bumaril at nakapatay kina Johndy Maglinte at Antonio Dalit.
Sina Maglinte at Dalit ang dalawang drug suspek na target ng ikinasang buy bust operation ng mga pulis sa Biñan City sa Laguna nuong isang linggo.
Ayon kay Philippine National Police (PNP) Chief P/GEN. Guillermo Eleazar, nagtugma ang mga balang nakita sa labi nila maglinte at dalit sa baril ng pulis batay sa isinagawang ballistics examination at cross checking.
Nagmula aniya ang bala na kumitil kay maglinte sa baril ng isang Police Senior Master Sergeant habang sa isang Police Commissioned Officer naman nagmula ang balang kumitil naman kay Dalit.
Ang kailangan na lamang mabigyang linaw sa ngayon ani Eleazar ay kung nagkaroon nga ba ng palitan ng putok sa pagitan ng mga suspek at ng mga pulis lalo’t mayruong alegasyon ang pamilya ng mga suspek na walang awa umano silang pinatay habang nakaposas at nakayuko.
