Pumalo na sa pitumpung libo (70,000) katao ang nagsilikas sa Marawi City dahil sa patuloy na bakbakan ng militar at Maute Group.
Ipinabatid ni DILG o Department of Interior and Local Government Undersecretary Catalino Cuy na nasa Lanao del Norte ang bulto ng evacuees o nasa tatlumput anim na libo dalawamput limang libo (36,025) namang evacuees ang nasa Iligan City at apat na libo (4,000) ang nasa Cagayan de Oro City.
Tumakbo naman aniya sa Bukidnon at Misamis Oriental ang tig-isanlibong (1,000) evacuees.
Tiniyak ni Cuy ang patuloy na pagkilos para tugunan ang mga pangangailangan ng mga evacuee.
Mga sibilyang na-rescue ng mga sundalo umakyat na sa mahigit 1,000
Umakyat na sa mahigit isanlibo at anim na raan (1,600) ang mga sibilyang na-rescue ng mga sundalo sa patuloy na clearing operations sa Marawi City.
Ayon pa sa AFP o Armed Forces of the Philippines, maingat ang mga sundalo sa kanilang operasyon sa lungsod dahil ginagamit ng mga teroristang Maute ang ilang sibilyan bilang human shield.
Binigyang diin ng AFP na pinapahalagahan nila ang buhay ng mga sibilyan kaya’t tuloy-tuloy ang kanilang operasyon para matiyak ang mga buhay na maililigtas nila.
200 estudyante sa Marawi lumipat na sa mga karatig paaralan sa ARMM
Tinatayang dalawandaang (200) estudyante ang naiipit sa kaguluhan sa Marawi City ang nag-enroll o lumipat na sa mga karatig paaralan sa ARMM.
Ayon kay DepEd o Department of Education Region 12 Director Arturo Bayocot, mahigit limampu (50) ng mga estudyante ay nag-enroll sa North Cotabato habang ang iba ay sa Sultan Kudarat.
Hinikayat naman ni Bayocot ang mga magulang na nasa mga evacuation centers na dalhin na lamang ang kanilang mga anak sa pinaka-malapit na public schools makaraang suspendihin ang pagbubukas ng klase sa Marawi City.
Tinatayang isang milyong (1M) estudyante sa halos isanlibo walundaang (1,800) elementary at secondary schools ang naka-enroll sa buong rehiyon.
By Judith Larino / Drew Nacino
