Hindi natitinag ang Malacañang sa mga nagnanais kuwestyunin sa Korte Suprema ang nilagdaang Tax Reform for Acceleration and Inclusion o TRAIN Law.
Ayon kay Presidential Spokesman Harry Roque, tiyak na sa basurahan lamang ang kahahantungan ng mga naturang petisyon na aniya’y walang batayan.
Handa aniya ang administrasyon na idepensa sa mga mahistrado ng High Tribunal ang nasabing batas na maganda ang epekto hindi lamang sa mga mahihirap kung hindi maging sa ekonomiya ng bansa.
Kasunod nito, hinimok ni Trade and Industry Secretary Ramon Lopez ang mga kritiko ng nasabing batas na pag-aralang mabuti ang nasabing batas bago sila gumawa ng anumang komento hinggil dito.
Nakatakdang pigilan ng Makabayan Bloc ang pag-arangkada ng Tax Reform Acceleration and Inclusion o TRAIN Law ng administrasyong Duterte.
Ayon kay ACT Teachers Party-list Representative Antonio Tinio, anumang araw sa susunod na linggo ay maghahain sila ng petisyon sa korte para kuwestyunin ang naging proseso ng pagkakapasa nito at ilan sa nilalaman ng naturang batas.
Aniya, naratipikahan ang TRAIN bill sa Kamara noong Disyembre 13 sa kabila ng kawalan ng quorum.
Sa kabila ng paghahain nito sa SC, naniniwala si Tinio na ang huling may say sa isyu ay ang taong bayan at malalaman ito sa eleksyon.
—-
