Pinasinungalingan ng Arnold Janssen Kalinga Foundation at Program Paghilom na mayroong parokya, simbahan, kumbento, o ministry center ang Society of the Divine Word sa address na “33 Clemente” sa Mindanao Avenue, Quezon City.
Ginawa ng mga grupo ang pahayag bilang pagtatanggol kay Fr. Flaviano “Flavie” Villanueva S.V.D. sa naging akusasyon ng labingwalong dating marines sa pagdinig ng Senate Blue Ribbon Committee na isa ang pari sa mga tumanggap umano ng male-maletang salapi kaugnay sa mga maanomalyang flood control project.
Ayon pa sa mga grupo, hindi lamang mali ang mga impormasyong inilahad ng mga dating sundalo, isa rin itong malisyoso, mapanirang-puri, at walang-katarungang paratang laban kay Fr. Villanueva, na inalay ang kanyang buhay sa paglilingkod sa mahihirap, pagtatanggol sa dignidad sa mga hindi napakikinggan, at pakikipag-kapwa sa mga pamilya ng mga biktima ng extra-judicial killings ng nakaraang administrasyon.
Kinokondena ng mga nasabing grupo ang pagsasa-publiko ng mga paratang na, para sa kanila, ay walang kalakip na ebidensya at kabalintunaan ng mga nailabas nang beripikadong impormasyon.
Handa rin silang ipagtanggol ang pari dahil sa kanyang pagkiling sa mga biktima ng karahasan at pagbibigay-boses sa mga hindi makapagsalita para sa kanilang mga sarili.
Sinimulan na ng mga naturang grupo ang pagsasampa ng kaso laban sa mga dati umanong marines na nauugnay sa flood control scandal dahil dapat anilang managot ang mga nagpapakalat ng maling paratang laban kay Fr. Villanueva.
Ipagpapatuloy din ni Fr. Villanueva ang kanyang paglilingkod sa mga mahihirap, mga biktima ng karahasan, at mga naghahanap ng katotohanan at katarungan. — sa panulat ni Anjo Riñon
