Dalawa ang kumpirmadong patay habang anim ang sugatan makaraang bumagsak ang isang crane sa ginagawang gusali ng isang paaralan sa Pasay City kahapon.
Nagtamo rin ng pinsala ang Core Town Building na isang residential – commercial building na katabi ng ginagawang STI Academic Center sa panulukan ng EDSA at P.Calle St., lugar kung saan naruon ang bumagsak na crane.
Kinilala ng Southern Police District ang mga nasawi na sina Roy Delos Reyes, isang janitor sa Core Town Building at ang crane operator na si Jonathan Diserdo.
Habang kinilala rin ang mga sugatan na sina Kumbo Mabinay at Jay Ballon, Liu Shen Xiu na isang Chinese national gayundin sina Francisco Angcatan, Melvin Yosores at Elmer Sedol na pawang mga crane erector.
Ayon kay Southern Police District Director C/Supt. Tomas Apolinario, humina ang pressure ng hydraulic cylinder ng crane na siyang dahilan ng pagbagsak nito.
