Pinabulaanan ng Philippine National Police (PNP) ang memo na kumakalat na nagsasabing isasailaim umano sa modified enhanced community quarantine (MECQ) buong Kamaynilaan kahapon, araw ng Sabado.
Nakasaad rin sa memo na ibinase umano ito sa kautusan ni National Capital Region Police Office (NCRPO) Chief Brig. Gen. Vicente Danao Jr. dahil sa mga ulat ng paglabag sa health protocols sa mga pampublikong lugar gaya ng mga mall.
Pahayag ni PNP Spokesperson Col. Ysmael Yu, fake news, at wala itong katotohanan dahil kung titingnan aniya ang heading pa lamang ng memo ay mapapansin nang hindi ito mula sa tanggapan ng NCRPO.
Wala rin aniya sa posisyon ang PNP na magdeklara ng anumang quarantine classification dahil tanging si Pang. Rodrigo Duterte lamang ang may kapangyarihang gumawa nito sa pamamagitan ng rekomendasyon ng IATF.