Inihayag ng isang mambabatas na malinaw na nangangampanya na si Davao City Mayor Sara Duterte sa kaniyang pag-iikot sa iba’t ibang panig ng bansa.
Ito’y ayon kay Act Teachers Partylist Rep. France Castro nang ihayag nitong nakikipag-usap na umano si Mayor Sarah sa mga lider politikal na indikasyon ng kaniyang pag-aasam sa pinakamataas na puwesto sa pamahalaan.
Binigyang diin pa nito, na ang pakikipagpulong ni Mayor Sarah kamakailan kina Zamboanga City Mayor Ma. Isabel Climaco at Cebu Governor Gwen Garcia ay isang pagpapatotoo na nagsisimula na ang kaniyang pag-iikot.
Pasaring pa ni Castro sa Alkalde, “action speaks louder than words” nang sabihin nitong may punto si Manila Mayor Isko Moreno sa pasaring nito na dapat nakatutok lamang sa kani-kanilang mga lugar ang mga Alkalde para bantayan ang sitwasyon ng COVID-19 at hindi nag-iikot sa mga pulitiko at partido gayung wala pang eleksyon.
