Isinulong sa kamara ang panukalang itaas ang allowance ng mga tanod at opisyal ng barangay sa bansa.
Sa House Bill No. 2349 na inihain nina Tingog party-list representative Yedda Marie Romualdez at Jude Acidre, layon nitong itaas sa P3,500 ang buwanang allowance para sa punong barangay, at P2,500 sa iba pang opisyal ng barangay kasama ang mga tanod.
Mula ang panukala sa P1,000 kada buwan na natatanggap bilang honorarium ng punong barangay, at P600 para sa sangguniang barangay member, barangay treasurer at barangay secretary.
Samantala, sinabi naman nina Romualdez at Acidrea na layon din ng panukalang mabigyan ng prayoridad ang pag-professionalize sa pagre-recruit ng mga manggagawa sa lokal na pamahalaan katulad ng mga opisyal ng barangay.
