Tinawag ng malakanyang na “makasarili” si Vice President Sara Duterte.
Ito’y matapos sabihin ni VP Sara na posible ngang gawin ang bente pesos na bigas ngunit hindi anya niya ibabahagi kung papaano dahil ayaw niyang tulungan si Pangulong Ferdinand Marcos Jr.
Ayon kay palace Press Officer at PCO Undersecretary Claire Castro, mistulang parang bata ang inasal ng bise presidente.
Binigyan-diin ng opisyal na hindi isang playground ang gobyerno para sa mga isip-bata na katulad ng bise presidente.
Giit ni Usec. Castro, lumalabas ang tunay nitong anyo at kulay bilang public servant na isang makasarili.
Kapakanan anya ng taumbayan ang dapat na mangibabaw, lalo pa at marami aniyang mga Pilipino ang nahihirapang bumili ng pagkain, kahit pa murang bigas.
Ipinunto pa ng Palace Official na ang pagtulong sa mahihirap na pilipino sa pamamagitan ng mga serbisyo tulad ng bentahan ng murang bigas ay hindi dapat itinatiming, bagkus, kung ano ang alam mong paraan para makatulong ay dapat na agad ibinabahagi at ginagawa.—sa panulat ni Kat Gonzales
