Nilinaw ng Malakaniyang na malaya ang sinuman na tumakbo sa pagkapangulo sa 2022 basta’t kuwalipikado ang mga ito sa ilalim ng batas.
Iyan ang reaksyon ni Presidential Spokesman Atty. Salvador Panelo sa naging pahayag naman ni Vice President Leni Robredo nitong weekend hinggil sa pagiging bukas nito sa mga oportunidad na naghihintay sa kaniya.
Ayon kay Panelo, sakaling nakamit naman ni Robredo ang mga pamantayan na hinihingi ng batas, wala siyang aasahang anumang balakid dito.
Magugunitang sa isang panayam, inamin ni Robredo na bukas siya sa anumang posibilidad sakaling bigyan siya ng pagkakataong pamunuan ang bansa sa kabila na rin ng mga kinahaharap niyang hamon bilang miyembro ng oposisyon.
