Posibleng 6 hanggang 15 beses na mas mataas ang bilang ng COVID-19 cases sa Metro Manila kumpara sa opisyal na naitatalang daily case bulletins ng Department of Health.
Ito ang pananaw ng grupong OCTA Research sa gitna ng patuloy na pagdami ng nagkakasakit sa bansa.
Ayon kay OCTA Research Fellow, Dr. Guido David, ibinatay nila ang pagtaya sa mga random rapid test na isinagawa ng Department of Transportation sa mga pasahero sa tren noong January 12 at 13 kung saan 12.4% ang COVID positive.
Kung ang populasyon anya ng NCR ay 14M, nangangahulugan itong ang prevalence range o dominant infection na 7.4 hanggang 17.4% ay nasa 1.04M hanggang 2.44M individuals ang aktuwal na may COVID-19 hanggang nitong January 13.
Dahil 165K ang active COVID-19 cases noong January 16 sa NCR, nangangahulugan din itong ang aktuwal na bilang ng kaso, kasama ang asymptomatic at symptomatic na hindi na-test at sumailalim sa antigen pero hindi inireport, ay maaaring 6 hanggang 15 beses na mataas sa official numbers.
