Umaasa si Senate President Vicente Sotto III na magkakaroon ng malakas at mahusay na ugnayan ang Senado at Kamara, sa ilalim ng kanyang pamumuno at ni bagong House Speaker Faustino “Bojie” Dy III.
Kasabay nito, sinabi ni S.P. Sotto na naniniwala siya sa kakayahan ni Speaker Dy bilang House Speaker at makabubuti para sa Kamara ang pag-upo nito sa nasabing pwesto.
Nagpaabot din ng pagbati ang lider ng Senado sa bagong lider ng Kamara, kasabay ng pagsasabing plano niyang makipag-usap kay Speaker Dy sa mga susunod na araw upang matalakay ang kanilang magiging legislative agenda.
Samantala, binati rin ni Senador Francis “Chiz” Escudero si Congressman Dy sa pagkakatalaga bilang House Speaker.
Ayon kay Sen. Escudero, matagal na niyang kakilala si Speaker Dy at tiwala siyang magagamit nito ang karanasan at matatag na pamumuno upang gabayan ang Kamara sa gitna ng mga kritikal na isyung kinakaharap ng bansa.
Iginiit ng senador na hindi dapat maging dahilan ang transition ng pamumuno upang malimutan ang mga isyu hinggil sa mga nakaraang budget at anomalya sa mga proyektong pang-imprastruktura.
