Mariing itinanggi ng actor TV host na si Luis Manzano na may tampuhan sila ng kaibigan niyang si Billy Crawford.
Ito ay matapos lumabas ang usap-usapan na masama ang loob ni Billy dahil sa pinalitan siya ni Luis bilang host sa isang bagong programa sa Kapamilya Network.
Sa isang panayam, sinabi ni Luis na hindi totoo ang mga lumalabas na balita at sa katunayan pa nga ay hiningi muna niya ang basbas at pagsang-ayon ni Billy bago tanggapin ang bagong show na Celebrity Playtime.
Si Billy rin daw ang una niyang naisip na pagsabihan nang malaman na magkakaroon ng pagbabago sa show at siya ang nasi kuhanin ng management.
Una nang nagpalabas ng pahayag ang pamunuan ng ABS-CBN na kaya pinalitan ni Luis si Billy bilang host ng Celebrity Playtime ay dahil sa magkasunod ang time slot nito sa isa pang programa ni Billy na Your Face Sounds Familiar.
By Jaymark Dagala
