Ikinatuwa ng LP o Liberal Party at Minority Bloc sa senado ang pasya ng Kongreso na huwag isama sa priority bills ang panukalang ibalik ang parusang kamatayan sa bansa.
Ayon sa LP, isa itong maliit pero makabuluhang tagumpay dahil magbibigay ito ng mas maraming oras sa mga mambabatas at sa publiko para higit na maintindihan ang mga isyung nakapaloob sa panukalang ibalik ang death penalty.
Gayundin, para makita ang mga posibleng panganib sakaling muling maisabatas ang parusang kamatayan.
De Lima pinayuhan ang mga senador na pro-death penalty
Pinayuhan ni Senador Leila De Lima si Senador Manny Pacquiao at iba pang mga senador na pabor sa death penalty na basahin ang librong may titulong “The Confession”.
Ayon kay De Lima, ang librong ito ay patungkol sa isang lalaki na siyam na taong nakulong bago napatawan ng parusang kamatayan.
Pero, anya, sa bandang huli ay napawalang sala ito kung kailan na-execute na ang parusang bitay.
Sinabi ni De Lima na bagamat fiction, pero makatotohanan aniya ang naturang istorya na dapat lamang isaalang-alang ng mga pro-death penalty.
- Meann Tanbio | Story from Cely Bueno
