Dismayado si San Pablo City, Laguna Mayor Amben Amante matapos lumubo ang bilang ng kanilang mino-monitor na close contact dahil umano sa pagsaway ng mga residente ng lungsod sa pinatutupad na quarantine protocols.
Dahil dito, nagdesisyon ang alkade na muling pairalin ang liquor ban.
Ayon kay Mayor Amante, ito ang kanyang nakikitang solusyon para maiwasan ang paglabag ng mga residente sa ipinagbabawal na social gatherings.
Tuwing nag-iinuman kasi anito, may mga grupo na gumagamit ng iisang baso para sa lahat at nag-iimbita pa ng mga kasama mula sa iba’t ibang bayan.
Sinabi ni Mayor Amante na umabot na sa pitumput isang close contacts, o yung mga taong nakasalamuha ng isang active COVID-19 patient, ang kanilang tinututukan sa kasalukuyan.
Humingi naman ng paumanhin ang alkade sa mga maaapektuhang business establishments at mga tindahan sa muling pagpapatupad ng liquor ban sa lungsod.
