Tinatayang aabot sa mahigit 4,000 pamilya o humigit 21,000 indibiduwal ang inilikas sa 86 na barangay sa lalawigan ng Catanduanes.
Ito’y makaraang unang hagupitin ang lalawigan ng bagyong Nina nang mag-land fall ito roon dakong alas-6:30 kagabi.
Ayon kay Catanduanes Governor Joseph cua, binuksan na rin nila maging ang kapitolyo ng lalawigan dahil na rin sa kakulangan ng mga evacuation centers sa kanilang lugar.
Ngunit dahil sa lakas ng hanging dala ng bagyo, nabasag ang mga bintana nito at natuklap ang bubungan ng kapitolyo.
Sa ngayon, putol ang suplay ng kuryente sa lugar at pahirapan din ang linya ng komunikasyon sa buong lalawigan dahil sa pananalasa ng bagyo.
Albay
Tinatayang aabot sa labing anim hanggang dalawampung libong pamilya naman ang inilikas sa lalawigan ng Albay.
Ito’y makaraan ang ikalawang land-fall ng bagyong Nina sa Sagñay sa Camarines Sur kagabi mula sa Catanduanes kung saan, isinailalim ang Albay sa signal number 3.
Aabot sa 25 evacuation centers ngayon sa nasabing lalawigan ang pansamantalang magiging tahanan ng mga apektadong pamilya hanggang sa muling bumuti ang lagay ng panahon.
Pagtitiyak naman ng pamahalaang panlalawigan ng Albay ang tulong sa mga sinalanta ng kalamidad bagama’t batid naman na sanay na ang mga Albayanon sa tuwing darating ang kalamidad tulad ng bagyo.
By Jaymark Dagala