Aarangkada na ngayong araw ang libreng sakay sa mga bus para sa mga pasahero sa ilalim ng Service Contracting Program ng Land Transportation Franchising and Regulatory Board (LTFRB).
Ayon kay LTFRB Executive Director Maria Kristina Cassion, naglaan ang kanilang ahensya ng P 7-B halaga sa ilalim ng 2022 General Appropriations Act.
Kabilang sa isang libong rutang bubuksan ang EDSA Bus Carousel pero hindi lahat ng ruta sa Metro Manila ay magkakaroon ng libreng sakay dahil hindi lahat ng mga operator at driver ay nakakumpleto ng kanilang requirements o dokumento sa pamamasada.
Aabot sa 13K hanggang 15K Public Utility Vehicle (PUV) kabilang na ang modern at traditional jeepneys, buses, at UV Express operators at drivers ang lalahok sa Free Ridership Program.
Ang mga lalahok sa libreng sakay program ng gobyerno ay makakatanggap ng one-time payout at weekly payments base sa bilang ng kilometrong kanilang ibibiyahe kada linggo, may pasahero man o wala.
Samantala, bubuksan din LTFRB sa susunod na mga araw ang ruta ng serbisyo ng NLEX hanggang Metro Manila para sa libreng ridership program. —sa panulat ni Angelica Doctolero
