Malayang magkaroon ng transaksyon ang mga local government unit (LGU) sa mga pharmaceutical firms para sa pagbili ng bakuna kontra COVID-19.
Ito ang nilinaw ni DILG Spokesperson Undersecretary Jonathan Malaya sa gitna ng mga apela na payagan na ang mga LGU na direktang makabili ng COVID-19 vaccine sa mga manufacturer.
Ayon kay Malaya, bukas naman sa lahat ang pakikipagnegosasyon sa mga pharmaceutical company kung nais nilang bumili ng bakuna.
Aniya ang pakiusap lang nila, bago sana magkapirmahan ay magkaroon muna ng koordinasyon sa national task force COVID-19 partikular kay Vaccine Czar General Carlito Galvez.
Paliwanag ni Malaya, ito ay para matiyak ang kalidad ng bibilhing bakuna at maging ang proseso ng distribusyon sa bansa.